Gonzales, Bersamina nanguna sa Battle of GMs

NAGSALO sa liderato sina 7th seed Grandmaster Jayson Gonzales at 8th seed International Master Paulo Bersamina sa men’s division habang sinolo ni 8th seed Woman National Master Christy Lamiel Bernales ang unahan sa ginaganap na Battle of the Grandmasters 2016 National Chess Championships-Grand Finals matapos ang ikalimang round sa Philippine Sports Commission National Athletes Dining Hall sa Rizal Memorial Sports Complex.

Nakihati sa nakatayang dalawang puntos si Gonzales kay top seed GM John Paul Gomez para makaipon ng pitong puntos sa posibleng 10 puntos. Hangad ni Gonzales makopo ang unang titulo sa taunang torneo matapos ang huli nitong best finish sa top five na nagtulak dito sa Calvia 36th World Chess Olympiad noong 2004.

“Passion na lang,” sabi ni Gonzales sa matikas na kampanya kahit nasa pangalawang sunod na taong paminsan-minsang paglalaro matapos makasama sa Tromso 2014 World Chess Olympiad dahil sa trabaho bilang executive director ng National Chess Federation of the Philippines simula 2011 hanggang ngayon.

Kapantay nito si 2016 NCC-Semifinals champion Bersamina na binigo sa ikatlong sunod na pagkakataon ang dating lider na si 12th seed IM Chito Garma. Wagi rin ang pambato ng NU Bulldogs kay Garma sa 2016 NCC-Eliminations at sa Semifinals.

Nagsosolo naman sa 6.5 puntos ang 5th seed na si GM Eugene Torre na nakipag-draw kay 2nd seed GM Rogelio Antonio Jr. Sinamahan ni 12-time national champion Antonio si Garma na may 6.0 puntos sa 13-round chessfest na kukunin ang tatlo pang miyembro ng national team na sasamahan ang dalawang seeded ng NCFP sa paglahok ng bansa sa Baku 42nd World Chess Olympica 2016 sa Setyembre.

Kasama ni Gomez na may limang puntos sina 3rd seed GM Darwin Laylo, 4th seed US-based GM Rogelio Barcenilla, Jr., 10th seed National Master Hamed Nouri at 14th seed untitled John Marvin Miciano.

Muli naman nakaukit ng panalo para sa ikatlo nitong upset sa torneo ang 22-anyos na Novo Ecijana na si Bernales sa pagpapalasap ng kabiguan kay 14th seed WFM Allaney Jia Doroy para sa ikawalo nitong puntos.

Nakipag-draw si Mendoza kay national/FEU teammate at top seed WIM Janelle Mae Frayna tungo sa 7.0 puntos ng huli tulad nina 5th seed WIM Jan Jodilyn Fronda at 3rd seed WIM Catherine Secopito.

Tabla rin ang laban ni Fronda kay 12th seed at untitled Arvie Lozano habang pinadapa ni Secopito si 2016 NCC-Semis champ at untitled Judith Pineda.