Shaina umaming super fan din ni Yaya Dub: Gusto ko kasi yung humor at beauty niya!

KAHIT isang certified Kapamilya star, diretsong inamin ni Shaina Magdayao na isa rin siya sa milyun-milyong fans ni ng Dubsmash Queen na si Maine Mendoza.

Nakarating na kay Shaina ang komento ng maraming netizens na malaki ang pagkakahawig nila ng ka-loveteam ni Alden Richards, lalo na kapag naka-make up at nakalugay ang alun-along buhok nito.

Nagbigay ng reaksiyon si Shaina nang may magpadala sa kanya ng isang video kung saan mapapanood ang isang episode ng “All for Juan, Juan for All” segment ng Eat Bulaga. Sabi kasi ng isang winner sa “Sugod Bahay” kay Yaya Dub, “Kamukha ka ni Shaina. Si Shaina Magdayao, kamukha mo!”

Natawa bigla si Maine at nag-dialogue ng, “Kapag po naaksidente. Shaina-ng naaksidente,” sabay tawa ng dalaga.
Nang mapanood ito ni Shaina, agad nitong ni-repost ang video at nilagyan ng caption na: “Pag naaksidente? Uy hindi namaaaan!”

Dugtong ng Kapamilya actress, “I’m actually a fan 🙂 of your wit, humor and beauty!” Sinabi pa ni Shaina na may mga followers din siya na nagsabing kamukha niya si Maine sa ilang anggulo, “I actually get that too heehee so I guess it’s time that I say hellooooo or give a shout out to my kamukha, @mainedcm.”