Concert goers, sabog na bago pa man ang Close-Up party

Walang ebidensya ang pulisya na nagkaroon ng bentahan ng ipinagbabawal na gamot sa concert ground ng CloseU-p Summer Forever noong nakaraang buwan.
Ayon kay Senior Supt. Manuel Lukban, intelligence chief ng National Capital Region Police Office, gumamit ng ipinagbabawal na gamot ang mga nasawi bago pumasok sa concert ground sa Mall of Asia.
“We do confirm the report of Close-Up [na walang incidents of drug use],” ani Lukban sa pagdinig ng House committee on Metro Manila Development, on Dangerous Drugs at on Youth and Sports.
Sinabi ni Atty. Adon Gabriel, abugado ng Close-Up lawyer, hindi naganap ang bentahan ng ipinagbabawal na gamot sa loob ng concert grounds.
“There were no incidents of drug abuse during the first three concerts. It’s unfortunate that this incident occurred this year,” ani Gabriel. “We fully cooperated with NBI in their probe.”
Sinabi ni Lukban na nagamit lamang ang CloseUp concert sa pagbebenta ng mga ipinagbabawal na gamot gaya ng Green Amore. Ginagawa rin umano ang komunikasyon ng bumibili at nagbebenta sa social media.
Kinumpirma naman ni Dr. Romel Papa, hepe ng Forensic Investigation Division ng National Bureau of Investigation na nakakuha sila ang bakas ng ecstasy sa bangkay ng mga nasawi subalit tumanggi siya na tukuyin kung alin sa limang biktimang namatay ang kanyang tinutukoy.
“We can only give you the results of the test though we can’t identify who the samples were taken from,” ani Papa.
Natagpuang walang malay sa concert ground ang apat sa limang nasawi noong umaga ng Mayo 22. Dinala sila sa pagamutan kung saan sila binawian ng buhay. Ang ikalimang nasawi ay dinala sa ospital subalit pumanaw rin.
Ang Green Amore o pinaghalong shabu, ecstasy at Chinese gensing ang sinasabing ininom ng mga pumunta sa concert.