Bakbakang Baron-Kiko mala-pinoy action movie sa haba ng dakdakan

PARANG Pinoy action movie ang dating ng pag-aaway ngayon nina Baron Geisler at Kiko Matos. Hamunan sila nang hamunan, kudaan nang kudaan, bantaan sila nang bantaan.

Parang pelikulang aksiyon na bago magbarilan ay lita-litanyang sumbatan muna ang mamamagitan. “Winalanghiya mo ang pamilya ko!” sabi ng isa.  “Mas matinding pahirap ang ginawa mo sa mga mahal ko sa buhay!” isasagot naman ng isang action star na nagkukubli sa isang malaking puno.

Magpapalitan muna sila ng mga kilometrikong dayalog bago maganap ang pagbabarilan, chikahan muna bago ang paputukan, ganu’ng-ganu’n ang nangyayari ngayon kina Baron at Kiko. “Mahal kita, Kiko Matos, pero kapag nagkita tayo, bibigwasan kita! Magpakita ka sa akin!” banta ni Baron sa indie actor.

Ang sagot naman ni Kiko, “Mahal mo ako? Sige, kapag nagkita tayo, kiss kita! Sabihin mo lang kung saan and anytime, anywhere, I’ll be there!” sagot naman ni Kiko sa hamon ni Baron. Ganu’n na ganu’n. Hindi natapos ang away sa bar kung saan sinapak ni Kiko si Baron, may part two pa raw ang kuwento, hindi pa tapos ang lahat para sa kanila. Magtutuos pa raw sila uli.

Ang nagagawa nga naman ng alak sa mga taong hindi marunong magdala ng kalasingan. Ang alak ay sa tiyan inilalagay at hindi sa ulo. Huwag na lang kasing umiinom kung away lang naman ang hanap. Huwag nang magpakalasing kung hindi naman kayang dalhin!