Roxas pumangalawa na sa Pulse Asia-ABSCBN survey; Poe nasa ikatlong pwesto

NAUNGUSAN na ni dating Interior Secretary Mar Roxas si Senador Grace Poe sa ikalawang pwesto sa pinakabagong Pulse Asia survey na kinomisyon ng ABS-CBN, habang patuloy na lumalayo sa unang pwesto si Davao City Mayor Rodrigo Duterte na nakakuha ng 33 percent.

Ayon sa survey na ginawa noong Abril 26 hanggang 29, isang linggo matapos ang huling presidential debate na naganap sa Dagupan City, nakakuha si Roxas ng 22 percent mas mataas ng isang punto kay Poe, 21.

Sa nakaraang survey noong Abril 16 hanggang 20, si Duterte ay may 33 percent na sinundan naman ni Poe na 22 habang 20 si Roxas.  Ito rin ang kauna-unahan sa mga survey na pumang-apat lang si Vice President Jejomar Binay.

Ginawa ang survey sa may 4,000 katao na pawang mga botante na may biometrics.