Kris palalayain din agad ng Abu Sayyaf kahit walang kapalit na ransom money

Pansamantala mang nagpaalam sa kanyang mga programa si Kris Aquino ay siya pa rin ang pinagpipistahan ngayon sa social media. ‘Yun nga lang, hindi kagandahan ang mga isyung kinapapalooban ng aktres-TV host, puro pamba-bash ang inaabot niya ngayon na hindi na bago para kay Krissy.

Ayon sa mas nakararami ay ikinasasaya niya ang ganitong pangyayari na siya ang sentro ng atensiyon, siya ang pinagpipistahan kahit saan, nakasanayan na kasi ni Kris ang ganitong sitwasyon. Pagkatapos ng matinding akusasyon laban sa kanya dahil sa paggamit ng chopper na pag-aari ng gobyerno ay ang kontrobersiyal namang plano palang pagdukot sa kanya ng mga miyembro ng Abu Sayyaf ang laman ng lahat ng kuwentuhan ngayon kahit saan.

Pero mas marami ang hindi naniniwala sa rebelasyon ng kanyang kuyang pangulo, isang sumisigaw raw na namang gimik ito, para lang mailigaw ang sambayanan sa kontrobersiyal na chopper issue.
Nakakalungkot pero maraming kababayan natin ang parang gusto pang matamisin na natuloy raw sana ang pangingidnap ng bandidong grupo kay Kris.

Komento pa ng isang basher ni Kris, “Naku, siguradong palalayain din agad siya ng mga bumihag sa kanya dahil hindi nila matitiis ang kaartehan ni Kris! Mamomroblema kasi sila. Paano na ang lafang niya, ang mineral water na pampaligo niya, siguradong kaaasaran ‘yun ng mga bandido!”

Totoo man o imbento lang ang kuwento ay hindi natin gustong maging biktima ng kidnapping ang kahit sino, kahit pa ang may kaartehang si Kris Aquino, sa totoo lang.