Pag-iimprenta ng balota ipinagpaliban ng Comelec

Ipinagpaliban ng Comission on Elections nang isang linggo ang paglilimbag sana sa mga balota kahapon kaya pinangangambahan na maantala din ang eleksyon sa ilang lugar.

Pero ayon kay COMELEC Chairman Andres Bautista, maaaring maging “blessing in disguise” pa ang pagkaantala ng paglilimbag dahil marami pang magagawa ang komisyon bunsod nito.

Una dito, sinabi ni Commissioner Christian Robert Lim na di tinuloy ang paglilimbag ng balota sa National Printing Office dahil sa problema sa pagitan ng Consolidation and Canvassing System (CCS) at Election Management System (EMS), ang dalawang software na gagamitin ng election machines sa halalan.

Napag-alaman kasi na hindi tugma ang codes ng CCS at EMS kaya kailangang baguhin ang naunang codes para gumana nang maayos ang dalawang software.

“Ang problema, nakatali lahat yan, let’s say madami pa kaming problema, let’s say May 7 na nagco-configure pa rin kami ng machine, eh kung ‘di umabot sa area, hindi magkakaroon ng eleksyon,” sabi ni Lim sa mga reporter.

Pero bukod dito aniya ay marami pang dapat ikonsidera bago pag-aralan ang postponement ng halalan sa isang lugar.

“Kung 50 percent of an entire area are not ready for May 9, then we may have to look at postponing kasi majority, pero kung 5 percent lang ang affected, why would you postpone the 95 percent?,” ani Lim.

Dahil dito aniya ay pinag-iisipan ng COMELEC na paigsiin ang balota para mapabilis ang printing.

Matapos iyon, nagsagawa ng pulong-balitaan ang COMELEC kahapon ng hapon para pawiin ang pangamba na di magkaroon ng halalan sa ilang lugar.

“If ever there’s any delay it’s just in the actual printing of the ballots, but we think it will just be a one-week delay,” ani Bautista.

“I am quite confident that we’ll meet the timeline,” aniya pa.

Ayon kay Bautista, maaaring mapaganda pa ng pagkaantala ng paglilimbag ang sitwasyon dahil maiiba pa ng COMELEC ang itsura ng balota.

“It can turn out to be a blessing in disguise because I think now we can have flexibility in designing the ballot face, that will enable us to have a shorter ballot,” aniya.

“A shorter ballot is beneficial in several respects. First, is in terms of cost, in terms of paper, in terms of ink. And in terms of the speed of the machine… A shorter ballot will mean that we will conduct our elections faster,” aniya pa.

Sa pulong-balitaan noong hapon ay tumanggi na si Lim na magsalita sa pinangangambahang pagkaantala ng eleksyon sa ibang lugar, pero naniniwala pa rin na apektado nito ang timeline ng paghahanda ng COMELEC.

Paliwanag ni Lim, iniisip lang niya ang pagliit ng “buffer time” o pasobrang oras para ayusin ang mga problemang maaari pang sumulpot habang palapit ang halalan.

“It (delay in ballot printing) definitely affected the timeline, not only the printing of the ballot but also the pre-lot and the packing of the machines,” aniya.

Kahapon aniya ay sinisiguro na ng COMELEC na wala nang maeengkuwentrong problema ang software na gagamitin sa halalan.

“We want to make sure that the firmware we’re going to use will absolutely work on election day. It will disrupt a bit the timelines, but we’d rather take it than find out on election day that something’s wrong,” ani Lim.

Maaaring maisagawa ang paglilimbag ng balota sa susunod na Lunes o Martes, ayon naman kay Bautista.

– end –