Coco gagawin lahat para di mapahiya kay FPJ

COCO MARTIN

SIGURADONG mas magiging exciting naman ang mga susunod na eksena sa number one primetime series ng bansa na Ang Probinsyano sa ABS-CBN na pinagbibidahan ni Coco Martin.

Mapapanood na ang pagpapanggap niya bilang babae sa pagpapatuloy ng serye na napapanood after ng TV Patrol. Sabi nga ng kanyang fans, ang ganda-ganda ni Coco pag naging babae, pwedeng-pwedeng sumali sa mga beauty contest.

Gagamitin na nga ni Cardo (Coco) ang kanyang alindog habang nakabihis-babae upang mahuli ang sindikatong sangkot sa pagkawala ni Carmen (Bela Padilla).

Matapos ngang mapasakamay ni Olga (Gina Pareño) si Carmen, determinado si Cardo na hawakan ang kaso ng prostitusyon at alamin kung sino ang namumuno ng operasyon nito. At para mas maimbestigahan ang kaso, magpapanggap si Cardo bilang si Paloma.

Magamit kaya ni Paloma ang kanyang ganda upang maligtas si Carmen at ang iba pang biktima ng sindikato? Huwag palampasin ang mga maaaksyong tagpo sa FPJ’s Ang Probinsyano, gabi-gabi sa ABS-CBN. At siguradong proud na proud ngayon si FPJ kay Coco dahil sa dedication nito sa nasabing serye.