Bday wish kay Poe: tumakbong VP ni Mar

Umaasa ang kampo ni Interior and Local Government Sec. Mar Roxas na papayag na si Sen. Grace Poe na tumakbo sa pagkabise presidente.
Ito ay kahit pa alam ni Caloocan Rep. Edgar Erice na nag-iikot na si Poe at lumalabas na ang television commercial nito.
“Alam namin na nag-iikot na siya at may balita na magdedeclare na siya by September 15 or 16. But as we have said, it’s not over until its over,” ani Erice.
Nang tanungin kung ano ang birthday wish ni Erice kay Poe, na magdiriwang ng kanyang ika-47 kaarawan ngayong araw, sagot nito: “Sana ma-enlighten siya na hindi ganun kadali mamahala ng bansa.”
Sinabi ni Erice na magkakaroon ng mga bagong karanasan si Poe kapag naging bise presidente ito na kanyang magagamit kapag siya na ang tatakbo sa presidential election.
Ayon kay Erice sinabi ni Poe ng dumalaw ito sa Pangasinan na dapat magkaroon ng airport rito.
“I heard her saying… kailangang magkaroon ng international airport sa Pangasinan. Sa mga nakakaunawa matatawa ka sa ganung statement. Hindi feasible yun, in anyway,” ani Erice.
Kung hindi umano tatakbo si Poe sa ilalim ng administrasyon “hindi na tuwid na daan iyan, private road na iyan, personal ambition”.